كل يوم حب ( اه ولا)

بجد موضوع الحب ده عجيب وغريب ..... ما حدش فى الدنيا دى كلها يقدر يفسر لينا ايه اللى بيحصل بالظبط .....

ممكن تلاقى حد بيقولك انه لايمكن يحب تانى ابدا (طبعا قصده النهاردة .... وخصوصا اذا كان لسه واخد الصابونة ) وتانى يوم تلاقيه فرحان وبيغنى لما النسيم بيعدى قال بيحب جديد اوعى تستغرب او تستعجب ..... ولا تقول عليه مجنون اصل الموضوع ببساطة مش بايده خالص ...... دى حاجة بتاعت ربنا ( ربانى ) زى الزرع اللى بيطلع من غير ما حد يزرعه .... الناس بتقول زرع ربانى ( فى ناس بتقول زرع شيطانى ) ..... علشان كده الحب مش اوبشن فى ايداينا ممكن نغيره زى ما احنا عايزين از حتى نعمله دليت ..... الموضوع ببساطة مش فى ايداينا ........ دى حاجة ربانى .... فلو حد قال قدامك لايمكن احب تانى انا قلبى خلاص مات ..... ولاكانك سمعت حاجة

فى حاجة غريبة قوى ..... تلاقى حد بيقولك انا عملت المستحيل لفلان من غير ما يطلب والندل الخسيس الجبان .... الى اخره من قاموس الشتائم الممكنة والغير ممكنة ...... سبنى وراح يحب حد تانى ... بكرة ياخد على قفة ماهو ذنب ناس بتخلصه ناس ..... والموضوع ولا ذنب ولا حاجة ولا الموضوع اصلا بايد حد ولا هو بايدايه يحبك ولا يكرهك ...... بس الحقيقة انه بايدايه ما يجرحش اللى حبه بس .... اما الحب فده بتاع ربنا

الحب مش هو الجواز ..... ولا الجواز هو الحب ..... بمعنى انك ممكن كتير قوى تلاقى حد بيحبك وبيفهمك وبيحس بيك وزى ما بنقول كده فواله وانقسمت نصان اه والله ..... وفى الاخر يقولك خلينا اخوات ( طبعا ده اختراع جديد غير اخوة الدم وغير اخوة الرضاعة وغير اخوة الاسلام ..... دى اسمها اخوة الحب ) ماشى مع انكم عمركم ما هتكونوا اخوات ابدا ....... بس لازم تصدق ...... اعتبرها كيمياء عضوية ..... اما الجواز فممكن تلاقى ( وده كتير قوى ) حد ما عندوش مشاعر ناحية حد ويرتيط به ويكون جواز ناجح جدا ..... لانه ببساطة ومن غير زعل مجرد استعمال جسد من اجل الانجاب ..... وطالما حصل انجاب .... يبقى الحمد لله نجحو ..... وتمشى الحياة بين محاولة حب (تفشل ) فمحاولة عشرة (تفشل )فمحاولة تعود (تفشل ) فمحاولة تجنب (تفشل ) فمحاولة انتحار ( تنجح) وعجبى ..... اوعى تخدوا الموضوع بجد ..... لا الموضوع بيقى عشرة وبينجح .... ونسبة الانتحار قليلة قوى مش علشان الناس جبانة لا سمح الله ولا علشان الناس عندها ايمان قوى ..... ولكن لان الدنيا لازم تمشى وفى ناس كتير قوى كده ..... اما اللى بيتجوزو عن حب دول مجانين سيبك منهم

اكتر حاجة ممكن تضحك بجد وحده عمرها ما شافت واحد غير ساعة ما خطبها تلاقيها فرحانة وهتموت من الفرحة وهو كمان وبيحبو بعض حب ما فيش بعد منه حب وتحس بجوز كنارى قدامك طبعا بيحبو بعض زى ما كنت انا بحب الجزمة اللى ماما بتجبهالى غصب عنى للمدرسة وانا فى ابتدائى ....... محدش يزعل انا مش بقول عليكم جزم والله ولكن بقول انكم عايزين تحبو ..... فبتحبو حب المضطر اللى غصب عنه هيحب اللى قدامة ..... ومثلو طول النهار واللليل ومالة ..... ماهو ده الوقت الوحيد اللى ممكن تحبو فيه بعض ..... يمكن ربنا ينفخ فى صورتكم ( بلاش تفكير وحش وتفتكر انى كنت عايز اقول ينفخكم )....... وتحبو بعض وليه لا ...... ده حتى المثل بيقول ما محبة الا من بعد عداوة .... وانا اعرف ناس كده ..... المهم لازم نؤمن بان الجواز لا يعنى الحب